GANSAL SA MADALING ARAW
ikaw pa rin ang nasa isip
tila ako'y nananaginip
sa dibdib ika'y halukipkip
sinta kong walang kahulilip
nagising ng madaling araw
lalo't dama ko'y anong ginaw
bumangon, binuksan ang ilaw
habang nasa diwa ko'y ikaw
bawat araw ko'y kakayanin
iyon ang nais mong gagawin
ko, katawan ko'y palakasin
at unang nobela'y tapusin
pag madaling araw babangon
at isip na'y naglilimayon
maraming kabanata roon
ay pagtalakay sa kahapon
- gregoriovbituinjr.
06.25.2025
* GANSAL - katutubong tulang may siyam na pantig bawat taludtod
Walang komento:
Mag-post ng isang Komento